monumenta.ch > Hieronymus > Ezechiel, 9 > cb125.129r > csg75.41 > sectio 6 > Ezechiel, 19 > 4 > Samuelis I, 4 > sectio 21 > bnf11947.86 v > sectio 1 > Psalmi, 17 > sectio 15 > bavPal.lat.1663.241 > sectio 14 > Psalmi, 45 > sectio 49 > 14 > T > uwbM.p.th.q.1a.129 > sectio 14 > csg46.54 > csg866.75 > cpl1661.81 v > Psalmi, 34 > 4 > bsbClm6224.177 > sectio > csg48.206 > ad Romanos, 10 > Psalmi, 75 > bnfGrec107.247 > cb125.141r > sectio 13 > sectio 51 > sectio 9
Word Selection for Searching
Report an Error in this Sectio Magnify Greek
Hieronymus, Epistulae, 4, 106, 9
Decimo septimo Psalmo: Grando et carbones ignis . Et quaeritis cur Graecus istum versiculum secundo non habeat, interpositis duobus versibus. Sed sciendum, quia de Hebraico, et de Theodotionis editione in Septuaginta Interpretibus sub asterisco additum sit. In eodem: Qui perfecit pedes meos tanquam cervorum . Pro quo scribitis in Graeco inveniri ὡσεὶ ἐλάφου, id est, tanquam cervi: singularem numerum pro plurali. Sed in Hebraeo pluralis numerus positus est CHAIALOTH, et omnes Interpretes pluralem numerum transtulerunt. In eodem: Et dedisti mihi protectionem salutis tuae . Pro quo in Graeco vos legisse dixistis, τῆς σωτηρίας μου, id est, salutis meae. Sed in Hebraeo IESACHA, salutis tuae, significat, non, meae; quod et omnes Interpretes transtulerunt. In ipso: Supplantasti insurgentes in me subtus me . Pro quo in Graeco plus invenisse vos dicitis: Omnes insurgentes; sed, omnes, additum est. In eodem: Vivit Dominus, et benedictus Deus meus . Et dicitis in Graeco non haberi, meus. Quod non sub asterisco, sed ab ipsis Septuaginta de Hebraica Veritate translatum est; et cuncti Interpretes in hac parte consentiunt. In eodem: Liberator meus de gentibus iracundis . Pro quo in Graeco invenisse vos dicitis: Ab inimicis meis fortibus, sive potentibus. Et quia semel veritati studemus, si quid vel transferentis festinatione, vel scribentium, vitio depravatum est, simpliciter confiteri, et emendare debemus. In Hebraeo nihil aliud habet nisi hoc: Liberator meus ab inimicis meis. Septuaginta autem, iracundis, addiderunt. Et pro gentibus, tam in Hebraeo, quam in cunctis Interpretibus, inimici positi sunt: et miror, quomodo pro inimicis, gentes mutatae sint.